Prishtinë, 27 shtator - Ministrja e Industrisë dhe Tregtisë znj. Mimoza Kusari Lila dhe ministri i Ekonomisë së Turqisë, Zafer Caglayan nënshkruan, sot në Ankara, Marrëveshjen për Tregti të Lirë në mes Kosovës dhe Turqisë.

Në historinë e Kosovës, kjo është Marrëveshja e Parë e Tregtisë së Lirë e negociuar nga institucionet e Kosovës. Negociatat për këtë marrëvshje filluan në shtator të vitit të kaluar dhe u përmbyllen pas 4 raundeve.

Ministrja Kusari Lila tha se marrëveshja do të ndihmojë zhvillimin e biznesve, jetën e qytetarëve dhe ngritjen e investimeve të huaja.

“Nga marrëveshja do të përfitojnë qytetarët dhe bizneset e dy vendeve tona. Qytetarët e Kosovës nuk do të paguajnë tarifë doganore për produktet turke të cilat nuk prodhohen në Kosovë. Tarifa doganore do të eliminohet menjëherë për një numër të madh të produkteve, kryesisht atyre industriale duke i bërë ato më të lira për konsumatorët tanë”, tha Kusari Lila.

Njëkohësisht marrëveshja garanton heqjen e menjëhershme të tarifës doganore nga Turqia për të gjithë prodhuesit kosovarë që do të eksportojnë mallra industriale në Turqi.

“Kjo marrëveshje hap mundësi të mira për prodhuesit kosovar. Të gjitha produktet industriale kosovare dhe një numër i madh i produkteve bujqësore  do të lejohen të hyjnë në Turqi me tarifë doganore zero, menjëherë pas hyrjes në fuqi të marrëveshjes”, tha ministrja Kusari Lila.

Marrëveshja e Tregtisë së Lirë me Turqinë garanton mbrojtjen deri në 10 vite të sektorëve të ndjeshëm prodhues në Kosovë nga heqja e doganave për produktet me origjinë nga Turqia.

“Ne jemi kujdesur që gjatë negociatave të mbrojmë sektorët tanë prodhues të cilët kanë filluar të zhvillohen dhe të cilët kanë potencial të rritjes gjatë viteve të ardhshme. Marrëveshja garanton mbrojtjen me tarifë doganore deri në 10 vite për të gjitha këto produkte”, tha në fund ministrja Kusari Lila.

Ministri i Ekonomisë së Turqisë, z.Caglayan tha që kjo marrëveshje është një lajm i mirë për tregtinë e dy vendeve, qytetarët dhe bizneset tona.

“Ne sot po nënshkruajmë marrëveshjen e tregtisë së lirë e cila do të ndikojë pozitivisht në zhvillimin ekonomik të Kosovës dhe Turqisë. Kjo është  edhe një tregues që marrëdhëniet ekonomike në mes vendeve tona po forcohen për cdo ditë edhe më shumë”, tha Ministri Caglayan.

Ministri Caglayan tha që Marrëveshja hap mundësi të reja për rritjen e investimeve dhe shkëmbimeve tregtare në mes Kosovës dhe Turqisë.

“Ne sot po e trasojmë këtë autostradë ekonomike për bizneset tona. Tani ata duhet të shfrytëzojnë këtë përparësi dhe të shikojnë opcionet më të mira për të investuar në Kosovë dhe anasjelltas”, tha në fjalën e tij ministri Caglayan.

Marrëveshja e Tregtisë së Lirë në mes Kosovës dhe Turqisë është rezultat i negociatave të vazhdueshme për një vit në mes të dy ekipeve negociatore të dy vendeve.