Londër, 19 shkurt - Kina u bë tregu më i madh i arit në botë për herë të parë në vitin 2013, thuhet në \"Raportin e prirjeve të kërkesës për ar\" të publikuar të martën nga Këshilli Botëror i Arit me qendër në Londër.

Sipas raportit, kërkesa për ar në Kinë vjet shënoi shifrën rekord prej 1 066 tonësh, me një rritje vjetore 32 për qind.

Rritja e kërkesës së konsumatorëve për ar lidhet kryesisht me uljen e theksuar të çmimeve në tremujorin e dytë.

Në shkallë globale, kërkesa për ar në vitin 2013 ra me 15 për qind krahasuar me vitin 2012.

Shtetet e Bashkuara janë vendi që zotëron sasinë më të madhe të arit në botë me 8133.5 tonë, ndërsa Kina renditet e 6-ta me 1054.1 tonë.

\"Ende e shohim Kinën në rrugën e zhvillimit afatgjatë dhe ajo patjetër do të japë një kontribut të madh në treg sivjet, dhe ka shumë gjasa të vijojë të jetë tregu më i madh i arit në botë deri në fund të vitit,\" u shpreh Marcus Grubb, menaxheri për investimet në Këshillin Botëror të Arit.