Prishtinë, 20 shkurt - Agjencia e Statistikave të Kosovës (ASK) ka publikuar  “Indeksin e Çmimeve të Konsumit“  (IÇK) për muajin janar 2014.

Indeksi i tërësishëm i Çmimeve të Konsumit në Kosovë për muajin janar 2014 është më i lartë për 0,3 për qind , krahasuar me muajin dhjetor 2013.

Janari i vitit 2013 krahasuar me muajin dhjetor 2012 ishte me çmime më të larta për 0,6 për qind. Shkalla e inflacionit e matur në muajin janar 2014 me muajin janar 2013 ishte 0,2 për qind.

Shkalla mestarë vjetore e inflacionit në vitin 2013 sipas ASK-së ishte 1,8 për qind.

Ngritje e Indeksit të Çmimeve të Konsumit vërehet te nëngrupet: Perimet (7,8 për qind), buka dhe drithërat (0,9 për qind), duhani (3,0 për qind) me një ndikim të përbashkët prej 0,5 për qind në IÇK-it.

Ngritja u neutralizua kryesisht nga rënia e Indeksit të Çmimeve të Konsumit te nëngrupet: Pemët (-2,7 për qind), përdorimi i pajisjeve për transportin personal-naftë dhe benzinë për (-1,2 për qind) me një ndikim të përbashkët prej -0,2 për qind në IÇK-it.

Çmimet e Konsumit në Kosovë u ngritën për 0,2 për qind në muajin janar 2014 krahasuar me muajin janar 2013. Ngritje e çmimeve vërehet te nëngrupet: Mish (3,9 për qind), pemë (2,2 për qind), duhan (5,0 për qind), veshje (3,2 për qind), këpucë (3,6 për qind), orendi dhe aparatura, qilima dhe shtroja tjera për dysheme (3,0 për qind), shërbime hoteliere (3,2 për qind), shërbime bankare (35,5 për qind) me një ndikim të përbashkët prej 1,4 për qind në IÇK-it.

Ngritja u neutralizua kryesisht nga rënia e çmimeve te nëngrupet: Bukë dhe drithëra (-7,2 për qind), vajra dhe yndyra (-11,5 për qind), perime (-4,4 për qind), sheqer dhe ëmbëlsira (-4,8 për qind), përdorimi i pajisjeve për transportin personal-naftë dhe benzinë për (-2,9 për qind), me një ndikim të përbashkët prej -1,2 për qind në IÇK-it.