New York, 1 tetor - Kompania "Coca-Cola" humbi në vitin 2013 kurorën e markës më të fuqishme në botë si pasojë e fitimeve të mëdha të gjigantit informatik "Apple", duke rënë kështu në vend të tretë e paraprirë nga "Google", sipas një studimi të publikuar sot.

Që prej fillimeve në vitin 2000 të klasifikimit amerikan të specializuar për markat "Interbrand", kompania prodhuese e pijeve, konsiderohej kompania me fitime më të mëdha në botë.

Që prej këtij momenti vendi i parë në klasifikim i takon firmës me logon e mollës, fitimet e së cilës arritën deri në 98,31 miliardë dollarë, me një rritje vjetore prej 28 për qind.

Në vend të dytë, ndodhet një gjigand tjetër i ekonomisë së re, kompania "Google", fitimet e së cilës arritën në 93,29 miliardë dollarë me një rritje prej 34 për qind.

Më pas vjen kompania "Coca-Cola" me fitime prej 79,21 miliardë dollarësh dhe një rritje vjetore prej 2 për qind.

Kompanitë lider të informatikës, IBM (me rritje 4 për qind e fitime 78,80 miliardë dollarë) dhe "Microsoft" (me rritje 3 për qind e fitime 59,54 miliardë dollarë) ndodhen në vendin e katërt e të pestë respektivisht.

Në vitin 2011, kompania "Apple" ishte e teta në klasifikim ndërsa "Google" e katërta.

Gjatë asaj kohe në tre vendet e para ishin "Coca-Cola", IBM dhe "Microsoft".

"'Apple' është një kompani me një rritje marramendëse fitimesh. Për të mbajtur vendin e parë vitin e ardhshëm, asaj do t'i duhet të monitorojë fitimet e vrullshme të rivalit të saj "Samsung" në tregjet e telefonisë celulare", thekson raporti i "Interbrand".

Në total, në 10 vendet e para figurojnë gjashtë marka të teknologjisë së lartë, përveç "Apple", "Google", IBM dhe "Microsoft", gjejmë "Samsung" në vendin e tetë dhe "Intel" në vendin e nëntë.

Konstruktori i automobilëve "Toyota" është i dhjeti, ndjekur nga rivalët gjermanë "Mercedes-Benz" në vendin e njëmbëdhjetë dhe BMW në vendin e dymbëdhjetë.