Prishtinë, 26 nëntor - Agjencia Kosovare e Privatizimit (AKP) njofton se ka tërhequr nga shitja Njësinë nr. 11/Jugobanka Zyra në Zubin Potok; Njësinë nr. 12/Jugobanka Zyra në Zveçan dhe Njësinë nr. 13/Jugobanka Ndërtesa Administrative në Mitrovicë. Të tri këto njësi/asete ishin pjesë e tenderit përmes shitjes së aseteve në valën nr.23.

Dhoma e Posaçme e Gjykatës Supreme të Kosovës ka të lëshuar aktvendim, përmes të cilës është caktuar masa e përkohshme për asetet e BTH Jugobanka, prandaj Agjencia tërheq nga shitja asetet e lartëpërmendura deri në një vendim tjetër të Gjykatës.

Tenderi për shitjen e aseteve nr.23 tani përmban 74 njësi që gjenden në komuna të ndryshme të Republikës së Kosovës dhe të gjitha do të privatizohen përmes metodës së shitjes përmes likuidimit.

AKP ka shpallur njoftimin për tender në faqen e saj të internetit  ëëë.pak-ks.org dhe në gjitha mediat vendore të shkruara dhe elektronike.

Afati i fundit për para-kualifikim është data 4 dhjetor 2013, dita për dorëzimin e ofertave për asetet në vijim është data 11 dhjetor 2013, nga ora 10:00 deri në orën 12:00, kurse hapja e ofertave do të bëhet po të njëjtën ditë duke filluar nga ora 12:30, në praninë e pjesëmarrësve në tender, medieve si dhe me transmetim të drejtpërdrejt përmes kamerave për të mundësuar përcjelljen e ceremonisë nga gjithë opinioni i interesuar.