Gjilani do të bëhet me autostradë
Kjo autostradë është një nga prioritetet e Qeverisë së Kosovës, e cila tani udhëhiqet nga Lidhja Demokratike e Kosovës (LDK).
Ministri i Infrastrukturës (MI), Lutfi Zharku, ka bërë me dije se fund të vitit 2015 do të dihet çdo gjë për sa i përket ndërtimit të autostradës së re, e cila do ta lidhë Gjilanin me Prishtinën.
Sipas tij, punët fillestare në këtë projekt madhor kanë filluar me kontraktimin e një kompanie, e cila është duke bërë projektin ideor dhe, e cila për një kohë jo të gjatë, do ta sjellë në institucionet e Kosovës projektin për autostradën e tretë të Kosovës, pas atyre me Shqipërinë dhe Maqedoninë.
Zharku në një prononcim për gazetën “Epoka e re” ka thënë se Qeveria e Kosovës është shumë e interesuar që rajoni i Gjilanit të lidhet sa më shpejt me Prishtinën, pasi investimi në këtë rajon do të mundësojë lidhje me kryeqendrën e Kosovës.
“Kompania, e cila është kontraktuar për projektin ideor për autostradën Prishtinë – Gjilan, do t’i sjellë tri propozime reale, përfshirë edhe variantin aktual për zgjerimin e rrugës së vjetër, e cila kalon nëpër Graçanicë”, ka thënë ai.
Sipas tij, Qeveria e Kosovës, konkretisht Ministria e Infrastrukturës, po e shqyrton mundësinë që pasi një pjesë e kësaj traseje të vjetër, është duke u ndërtuar kah Graçanica, ta shikojë mundësinë që ta zgjerojë këtë rrugë.
“Pra, të gjitha variantet mbesin në tavolinë, por do të shikohet se cili është varianti më i mirë, duke i marrë për bazë edhe kostot buxhetore”, ka thënë ai.
Zharku ka shtuar se beson se punët në projektin ideor do të përfundojnë në gjysmën e parë të këtij viti.
“Sipas dinamikës së paraparë, punët në projektin ideor do të kryhen deri kah muaji i gjashtë. Pra, projekti ideor është ai i cili do ta na japë neve dritën jeshile, se si do të veprojmë më tutje, duke u koordinuar edhe me ministritë e tjera përkatëse”, ka deklaruar ai.
Zharku ka bërë me dije se në ndërtimin e autostradës së re për Gjilan, rol të rëndësishëm do të luajnë edhe komunat, nëpër të cilat do të kalojë autostrada e re, duke përfshirë edhe Komunën e Gjilanit, pasi deri atje do të ndërtohet autostrada.
Zharku nuk e ka përjashtuar mundësinë që kjo autostrada të kalojë edhe kah Lipjani por, sipas tij, qëllimi kryesor për ndërtimin e kësaj autostrade është që Gjilani të lidhet me Prishtinën.
“Të gjitha variantet do të jenë në tavolinë. Mund të supozojmë se do ta lidhim me autostradën, e cila është duke u ndërtuar kah Shkupi, apo nga Mati, nga Novobërda, apo ta bëjmë zgjerimin e rrugës së vjetër për ta bërë me katër korsi”, ka thënë ai.
/Epoka e re/
