Munich, 28 maj - Xherdan Shaqiri nuk është aspak i kënaqur me situatën e tij aktuale tek gjiganti gjerman Bayern Munich.

Ish-mesfushori i kampionëve të Zvicrës, Baselit nuk ka pasur hapësirat e duhura këtë stinor nën urdhrat e trajnerit spanjoll Pep Guardiola, dhe kjo nuk është duke i pëlqyer aspak atij.

Në një intervistë për mediat zvicerane, Xherdani ka treguar se do ta ndryshoj vetë situatën e tij nëse ajo nuk do të ndryshohet nga klubi.

“Nëse nuk ndryshohet gjendja, duhet ta ndryshojë vetë. Unë jam i ri dhe dua ta zhvillojë vetën.

Dua të luajë në ndeshje të mëdha nga fillimi dhe jo vetëm në ligë kur gjithçka përfundon. Nuk dua të përjetojë edhe një vit si ky”, u shpreh Shaqiri, i cili stinorin e kaluar pati më shumë minuta nën drejtimin e Jupp Heynckes. Ai tha se me trajnerin gjerman, Jupp Heynckes ka pasur besimin dhe hapësirat e duhura.

“Me Heynckesin ndihesha më me besim, ndoshta pasi Guardiola flet më pak me ne lojtarët. Stinorin e kaluar pata fat të keq me disa lëndime të vogla muskulore, por jam i lumtur që jam rikthyer”, shtoi tutje Xherdani. Për fund, Shaqiri nuk përjashtoi mundësinë që gjatë verës të transferohet te Liverpooli, skuadër kjo e cila kërkon shërbimet e tij. Ai tha se Anglia i pëlqen dhe nëse do të ndryshoj skuadër nuk do të luaj në Bundesligë.