Bernë, 11 mars - Mesfushori i Inter-it, Xherdan Shaqiri shumë shpejtë mund të marrë shiritin e kapitenit të përfaqësueses së Zvicrës. Këtë gjë e ka bërë të ditur përzgjedhësi i ‘helvetikëve’ Vladimir Petkovic.

Ai tha se kapiteni aktual Gokhan Inler mund ta humbë shumë shpejtë rolin e kapitenit, pasi nuk po paraqitet rregullisht për skuadrën e tij Napoli-n, ndërsa ky epitet pritet t’i besohet Shaqirit.

“Është shumë e qartë se Inler ia ka hapur dyert Shaqirit që ky i fundit të marrë rolin e kapitenit. Inler tani e ka situatën e njëjtë të cilën e kishte Shaqiri në Bayern. Xherdani tash po luan në një ekip të mirë, pasi ai e donte një ekip të mirë.\"

\"Ai po luan rregullisht dhe kjo gjë nuk ndodhte në Bayern. Unë besoj se shumë shpejt Shaqiri do të jetë në rolin e kapitenit te përfaqësuesja zvicerane”, u shpreh Petkovic për të përditshmen zvicerane Blick.ch.