Rio de Zhanerio, 19 qershor - Kampionia e botës, Spanja, edhe zyrtarisht është eliminuar nga Botërori, Brazili 2014, pas disfatës së rëndë në ndeshjen vendimtare ndaj Kilit me rezultat 2-0.

Pasi pësoi humbjen më të thellë që një kampion i botës e pësoi ndonjëherë në Botëror, Spanja nuk tregoi shenja të këndelljes në Maracana.

Në stadiumin më të madh të këtij Botërori ishte Kili që nisi më mirë, duke dominuar sfidën me disa aksione të rrezikshme.

Ishte Sanchez ai që rrezikoi në fillim portën e Spanjës, që pasoi një dominim të lartë të Kilit, me Spanjën që ishte inepte.

Alonso ishte pranë golit kur rrezikoi portën, por atë tentim te ndali vetëm portieri i Kilit.

Dhe, pas një aksioni shumë mirë të organizuar, ishte Eduardo Vargas ai që reagoi më së miri në zonë për të mposhtur Iker Casillasin dhe për të kaluar Kilin në epërsi (20′).

Në vazhdim Kili dominoi dhe kishte aksione të shumta. Spanja ishte e përgjumur.

Në minutën e 43-të ishte një goditje nga Alexis Sanchez ajo që nuk arriti ta ndalë Iker Casillas dhe nga topi i kthyer ishte Charles Aranguiz ai që dyfishoi epërsinë e Kilit në këtë takim.

Pjesa e dytë kaloi me natyrisht dominim të Spanjës, por Kili u mbrojt mirë.

Vlen të përmendet një rast kur Sergio Busquets pas një asistimi të shkëlqyer nga Diego Costa nuk arriri që në portën e zbrazët nga një metër të realizojë.

Spanja me kalimin e kohës e kishte të vështirë, dhe Iniesta ishte ai që tentoi me goditje nga distanca të zvogëlojë, edhe pse pa asnjë gjasë.

Deri në fund asgjë nuk ndryshoi dhe Kili e fitoi ndeshjen me rezultat 2-0.

Pas ndeshjeve të dyta në Grupin B është Holanda që prin me gjashtë pikë, po aq pikë sa ka Kili, por Tulipanët kanë golaverazh më të mirë. Spanja dhe Australia kanë zero pikë.

Vendi i parë në Grupin B do të vendoset në duelin direkt mes Holandës dhe Kilit, teksa Spanja dhe Australia do të luajnë vetëm për prestigj pasi s’kanë gjasa për çerekfinale.