Rio de Zhanerio, 25 qershor - Zviceranët kanë triumfuar në stadiumin “Arena Amazonia” të Manaus kundër Hondurasit me rezultat prej 3:0, ku tre golat për “helvetikët” i realizoi super Xherdan Shaqiri.

Në minutën e dytë të takimit sulmuesi shqiptar Xherdan Shaqiri pati rastin e parë për të kaluar në epërsi ekipin zviceran, por nga një afërsi prej gjashtë metrash nuk u tregua i suksesshëm. Por, vetëm tre minuta më vonë “Shaqa” realizoi një supergol, kur dërgoi një projektil nga rreth 20 metra në drejtim të golit të hondurasve.

Shaqiri sërish realizoi gol në minutën e 30 të takimit, kur pas një kundër sulmi të shpejt, morri një pasim të saktë nga ana e Josip Drmiq, dhe sulmuesi shqiptar shënoi për herë të dytë në këtë sfidë.

I disponuari për ndeshje, Shaqiri ishte në rast për shënim edhe në minutën e 58 të takimit, por kësaj radhe më i suksesshëm u tregua portieri honduras, Dominguez.

Në minutën e 61 të takimit Hondurasit iu mohua një penalti kur mbrojtësi zviceran Johan Djourou ndërhyri në mënyrë të palejuar brenda zonës së rreptësisë në sulmuesin Jerry Palacio.

Por, Shaqiri nuk e kishte ndërmend të ndalet. Ai realizoi “hat-trick”, përkatësisht golin e tretë për zviceranët në minutën e 71 të takimit, kur morri një pasim të saktë nga sërish ana e Josip Drmiqit.

Admir Mehmedi pati rast për të shënuar golin e katërt për zviceranët në minutën e 81 të takimit, por nuk u tregua i suksesshëm nga afërsia, dhe ky ishte rasti i fundit në ndeshje, ku zviceranët me golat e Shaqirit triumfuan me rezultat prej 3:0.

Vlen të theksohet se zviceranët deri më tani në botëror kanë realizuar shtatë gola, ku nga ato gjashtë kanë vulën e futbollistëve shqiptar. Deri më tani më i suksesshëm ishte Xherdan Shaqiri me tre gola, ndërsa Granit Xhaka, Blerim Xhemajli dhe Admir Mehmedi realizuan nga një sosh.

Pas kësaj fitoreje, Zvicra përfundon fazën grupore me gjashtë pikë, ndërsa Honduras zë pozitën e fundit me asnjë pikë të fituar. Zvicra për kundërshtar në 1/8 e finales do ta ketë Argjentinën, ndërsa Franca do të takohet me Nigerinë.