Madrid, 6 nëntor - Cristiano Ronaldo ka thyer rekordin e golave të shënuar në Ligën e Kampionëve brenda një viti kalendarik, me golin e realizuar ndaj Juventusit.

Ky ishte goli i tetë i yllit protugez brenda katër xhirosh në Grupin B dhe i 14-ti brenda vitit 2013 dhe në këtë mënyrë thyen rekordin paraprak prej 13 golash që e kishte vënë Lionel Messi në vitin 2012.

Për Ronaldon, ky ishte goli i 59-të në Ligën e Kampionëve dhe tash i duhet vetëm edhe një gol për të lënë prapa Ruud van Nistelrooyn, derisa do të ndjekë Messin (63 gola) dhe Raulin (71 gola) për të marrë primatin si golashënuesi më i mirë në histori të Ligës së Kampionëve.