Paris, 16 tetor - Franck Ribery ka shprehur frikën e tij se Franca mund të përballet me Portugalinë ose Kroacinë në ndeshjet e barazhit për Kampionatin Botëror që do të mbahet vitin e ardhshëm.

Fitorja e Spanjës kundër Gjeorgjisë të martën siguroi që “tre kolorët” të përfundonin në pozitën e dytë në grupin G, edhe pse fituan 3-0 kundër Finlandës.

Djelmoshat e Didier Deschamps tani pasi kanë siguruar barazhin, ata mund të përballen me Greqinë, Suedinë, Kroacinë apo Cristiano Ronaldon dhe kompaninë e tij.

“Ndeshjet e barazhit nuk janë të lehta”, ka thënë sulmuesi i Bayern Munichut, i cili shënoi golin e parë kundër Finlandës të martën.

“Duhet të bëhemi burra dhe ta shfaqim më të mirën nga vetja në dy ndeshjet e barazhit  sepse duhet të bëjmë çdo gjë për të shkuar në Brazil. Është Kupa Botërore. Shpresojmë që të mos përballemi me Portugalinë dhe Kroacinë”, ka shtuar francezi.