Barcelonë, 10 korrik - Sulmuesi i Liverpoolit, Luis Suarez, është shumë pranë zyrtarizimit si lojtar i Barcelonës, pasi dy klubet kanë arritur marrëveshje për shumën e transferimit, e cila është 88 milionë euro.

Arritja e marrëveshjes vjen pas negociatave njëjavore, ndërsa brenda 24 orësh pritet të bëhet edhe konfirmimi zyrtar. Barca e ka transferuar uruguaianin me ofertë vetëm me para duke u pajtuar që ta paguajë klauzolën për prishjen e kontratës së tij.

Mësohet se 27-vjeçari do t’i bëjë ekzaminimet mjekësore në Uruguai, ku po qëndron pas eliminimit nga Kampionati Botëror, por natyrisht, nën mbikëqyrjen e mjekëve të klubit katalunas.

Zgjatja e negociatave ishte për faktin se dy klubet nuk pajtoheshin për mënyrën e pagesës. Liverpooli kërkonte një shumë më të madhe fillestare.

Suarez do të jetë padyshim transferimi më i madh për Barcelonën, ndoshta edhe në përgjithësi i këtij afati kalimtar.

Derisa t’i përfundojë suspendimi katërmujor, ai nuk ka të drejtë as të stërvitet me klubin e tij të ri.