Madrid, 30 qershor - Toni Kroos do të jetë blerja e parë e Realit të Madridit për sezonin 2014-2015.

Sikurse informon spanjollja “Marca”, tashmë është arritur marrëveshja mes lojtarit dhe drejtuesve të Los Blancos që do të paguajnë deri 30 milionë Euro për kompletimin e këtij transferimi.

Kroos do të nënshkruajë një kontratë 5-vjeçare me madrilenët në bazë të së cilës do të përfitojë 5 milionë Euro në sezon. 24 –vjeçari thuajse të njëjtën pagë kishte edhe te Bayerni, por në kryeqytetin spanjoll mendohet se shuma do të rritet ndjeshëm me bonuset.

Gjithsesi nga ajo që raporton “Marca” nuk thuhet nëse Reali ka gjetur gjuhën e përbashkët me Bayernin e Mynihut që zotëron kartonin e lojtarit me kontratën që i përfundon në vitin 2015.