Madrid, 17 shtator - Në Spanjë e cilësojnë si lufta e shifrave, mes Barcelonës dhe Realit, por dhe mes Mesit dhe Ronaldos.

Ngritja e pagës së njërit dhe kundërpërgjigja me rinovimin e tjetrit ka krijuar një përshtjellim jo të vogël në një vend që aktualisht është në krizë financiare, të paktën në aspektin shoqëror sepse në planin futbollistik klubet spanjolle nuk po njohin krizë.

Por cfarë fshihet realisht pas xhelozisë së Mesit, një lojtar që përfiton 35 milion euro në sezon. Ronaldo jo vetëm përfiton një pagë më të madhe se argjentinasi, por dhe të ardhurat e tij vjetore tashmë janë rritur në 41 milion euro, ku 17 rrjedhin nga paga ndërsa pjesa tjetër nga kontratat publicitare. 

Interesant është fakti se aktualisht Ronaldo përfiton 24 milion euro në vit nga imazhi I tij, duke zotëruar vetëm 40 përqind të të ardhurave që rrjedhin nga kjo, ndërkohë që Mesi përfiton 22.5 milion euro duke pasur në kontroll 100 përqind të imazhit të tij.

Pra Ronaldo me pak fjalë e ka parakaluar argjentinasin dhe në aspektin e marketingut, dhe e vetmja gjë me të cilën Mesi mund të krenohet tani përballë Ronaldos janë trofetë personalë por dhe ato në nivel klubesh.

A nuk duhet të jenë pikërisht këto ato që duhet të kenë më shumë vlerë në futboll sesa paga vjetore. Mesa duket për milionerët e rinj të lojës, kanë më shumë vlerë kuotat e tyre në bursën e pagave.