Barcelonë, 11 shkurt - Ish-mbrojtësi i Barcelonës, Ronald Koeman, beson se katalunasit do ta dëshmojnë se janë shumë të fortë për Manchester Cityn në Ligën e Kampionëve.

Futbollistët e Luis Enriques do të përballën me kampionin e Anglisë në fazën e eliminimeve të Ligës së Kampionëve, ndërsa trajneri i Southamptonit mendon se spanjollët janë më të mirë.

“Barcelona është më e mirë se skuadra aktuale e Manchester Cityt. Plus, Barcelona e ka avantazhin e zhvillimit të ndeshjes kthyese para tifozëve të saj”, citohet të ketë thënë Koeman për Sport.

“Barcelona gjithmonë është favorite sepse ata luajnë njëjtë pa marrë parasysh a luajnë në shtëpi apo në udhëtim. Ata kurrë nuk luajnë për t’u mbrojtur ose për t’ia prishur lojën kundërshtarit”.

“City ka shumë cilësi dhe kanë konkurruar vërtetë mirë, mirëpo nuk besoj se ata mund ta tejkalojnë Barcelonën”, ka shtuar Koeman.