Dortmund, 31 tetor - Klopp dhe Borussia Dortmund, një dashuri që do të vazhdojë të paktën edhe për 5 sezone.

Trajneri që ringriti skuadrën gjermane pasi u ul në stolin e saj gjatë vitit 2008 ka hedhur të zezën mbi të bardhë deri në vitin 2018 duke u dhënë fund zërave për një largim të mundshëm.

I kontaktuar nga shumë klube të mëdha europiane, Klopp dhe Borussia e Dortmundit shprehën angazhimin respektiv për të vazhduar projektin e nisur 5 vjet më parë kur tekniku u transferua nga Mainzi.

Për momentin nuk bëhen të ditura detajet e rinovimit, por tashmë është e sigurt se me kontratën e re, Klopp do të përmbushë një cikël 10-vjeçar në “Signal Iduna Park” ku është kthyer në qendër të projektit të shoqërisë, e cila ishte zhytur në krizë rezultatesh prej shumë vitesh.

Nën drejtimin e Borussias së Dortmundit, Klopp ka fituar dy tituj kampionë, ndërsa sezonin e shkuar dështoi në finalen e UEFA Champions League kundër Bayernit të Mynihut ku skuadra e tij shkoi pas plot 16 viteve.

46-vjeçari e ka drejtuar skuadrën gjatë 234 ndeshjeve duke koleksionuar 136 fitore, 56 barazime dhe vetëm 42 humbje. Aktualisht, Borussia Dortmund mban vendin e dytë të klasifikimit në Bundesliga me 1 pikë më pak se Bayerni i Mynihut.