Madrid, 5 shtator - Ricardo Kaka ka falënderuar përmes një letre lamtumire lojtarët dhe tifozët e Real Madrid për katër vitet që kaluan bashkë tek \"Los Blancos\".

Futbollisti që u ble për 65 milionë euro dhe që paguhej 10 milionë në sezon nuk mundi të ishte pjesë e rëndësishme e madrilenëve duke u rikthyer sërish te Milan.

Në të shkruhet: \"Të dashur madrilenë. Katër vite punë dhe përkushtim. Në këto katër vite kam veshur fanellen e bardhë të vërtetë, kam fituar tre trofe dhe Reali mund ta gëzojë respektin dhe dashurinë time. Rikthimi te Milani është një faqe e re e jetës sime, por unë do t’i mbaj në zemër momentet e mëdha që kalova në Spanjë, duke ditur se dhashë kontribut në suksesin e klubit. Të jesh pjesë e historisë së këtij klubi të madh si Real Madrid është një nga pjesët më të mira të jetes sime, edhe pse kalova momente të vështira.\"

\"Më lejoni t’i falënderoj të gjithë kolegët e mi, trajnerët, të gjithë punonjësit, menaxhimin e klubit, presidentin Florentino Perez, tifozët e Real Madrid dhe të gjithë në mbarë botën që më kanë mbështetur mua. Faleminderit shumë dhe \"Hala Madrid\".

31-vjeçari brazilian fitoi me \"Los Blancos\" titullin në La Liga, Copa del Rey dhe Superkupën e Spanjës.