Milano, 1 korrik - Interi e ka nxjerrë “në pension” fanellën me numrin 4 për nder të Javier Zanettit dhe legjenda nerazzurre do të bëhet zëvendëspresident i klubit për dy vitet e ardhshme, ka njoftuar Erick Thohir.

Argjentinasi i dha fund karrierës si futbollist aktiv, ndërsa në 19 vitet e fundit kishte luajtur me fanellën zikaltër.

Gjatë kësaj periudhe, ai ka fituar, mes tjerash, pesë tituj të Serie A, katër Kupa të Italisë, një titull të Ligës së Kampionëve dhe një Kupë të Botës për Klube.

“Zanetti do të jetë zëvendëspresident për dy vite. Po ashtu, bordi ka vendosur që ta pensionojë fanellën e tij me numrin 4”, ka deklaruar Thohir për La Gazzetta dello Sport.

Presidenti i klubit ka thënë se shpreson në rinovimin e trajnerit Walter Mazzarri dhe njëherësh ka treguar se ka marrë një ofertë për shitjen e Mauro Icardit, porse dëshiron ta mbajë në skuadër.