Madrid, 20 dhjetor - Andres Iniesta do të bëhet lojtari më i paguar në Barcelonë pas Lionel Messit kur ai të hënën të nënshkruajë kontratën e re, e cila i jep fund interesit të Real Madridit për yllin spanjoll.

Presidenti i Barcelonës, Sandro Rosell ka bërë të ditur të enjten se Iniesta ka arritur marrëveshje për vazhdimin e kontratës deri në vitin 2018 dhe mesfushori do të paguhet rreth 14 milionë euro në vit, gati dyfish më shumë se tani.

Në atë kohë, heroi i finales së Kampionatit Botëror 2010 do të jetë 34-vjeçar ndërsa Rosell ka thënë se vazhdimi i kontratës në vitin 2018 do të varet nga ndeshjet që luan.

“Mund të konfirmoj se Iniesta është pajtuar të nënshkruajë [kontratën]”, ka thënë Rosell. “Asgjë nuk është nënshkruar por kemi një marrëveshje verbale, e cila ndoshta do të nënshkruhet të hënën”.

Mesfushori, i cili debutoi në vitin 2002, ka luajtur 479 ndeshje për Blaugranat, duke shënuar 48 gola.