Napoli, 15 qershor - Mbrojtësi i Kombëtares shqiptare Elseid Hysaj është shumë pranë transferimit tek Napoli. Ky është lajmi që raportojnë sot mediat italiane.

Sipas ueb-faqes pranë klubit napolitan “calcionapoli24.it”, ish-trajneri i Hysajt tek Empoli Maurizio Sarri kërkon me çdo kusht shqiptarin tek skuadra e tij e re.

Sarri ka qenë trajner i Empoli deri sezonin e kaluar ku arriti objektivin e caktuar qëndrimin në Serie A.

Mediat italiane shkruajnë se Hysaj shihet si zëvendësuesi ideal i Christian Maggio-s tek Napoli. Vetë lojtari shkodran konfirmoi pak ditë më parë interesimin e gjigantit italian, ndërsa tha se këtë javë do të nisnin bisedimet.

Hysaj kërkon një ekip më të madh, pas paraqitjes befasuese të kampionatit të kaluar, por dhe aktivizimit si titullar në kombëtaren e Xhani De Biazit.

Mbrojtësi ka zhvilluar 36 ndeshje në sezonin që debutoi në Serie A duke spikatur në disa takime, veçanërisht përballë Milanit ku dha pasimin për gol Massimo Maccarones.

Kartoni i Elseid Hysaj vlen rreth 5 milionë euro. Nga Empoli te Napoli mund të transferohet edhe Mirko Valdifiori. Mesfushori pritet të jetë një tjetër përforcim për Napolin që në këtë sezon zhgënjeu si në kampionat edhe Ligën e Kampionëve.