Napoli, 3 prill - Mesfushori i Napolit, Valon Behrami, gjatë verës mund të kthehet në Premier League.

Menaxheri Fali Ramadani, siç njoftojnë mediumet në Itali, ka shkuar në Angli për të biseduar me krerët e skuadrës së Tottenhamit për transferimin e mundshëm të Behramit në këtë skuadër.

"E ardhmja e Valon Behramit mund të jetë larg nga Napoli. Trajneri Rafa Benitez po preferon kohëve të fundit të luajë me dyshen Inler dhe Jorginho në mesfushë dhe Behramin më nuk po e konsideron të pazëvendësueshëm, andaj ai mund të largohet gjatë verës.

Menaxheri Fali Ramadani ka udhëtuar në Angli për të biseduar me krerët e Tottenhamit për mundësinë e lëvizjes së Behramit në Premier League", shkruan "europacalcio.it".

Behrami 28-vjeçar me Napolin ka kontratë deri në qershor të vitit 2017. Ai në të kaluarën ka luajtur në Premier League me West Ham Unitedin.