Dordmund, 26 tetor - Zlatan Ibrahimovic është në super formë. Ylli suedez po shënon gola të bukur në çdo ndeshje dhe kjo ka bërë që e tërë vëmendja të vihet tek ai kohëve të fundit. Madje, menaxheri i tij, Mino Raiola thotë se futbollisti me prejardhje boshnjake e meriton ‘Topin e Artë’.

Ndërkaq, legjenda gjermane Franz Beckenbauer mendon se 32 vjeçari është njëri prej tre sulmuesve më të mirë në botë.

“Unë jap nota të larta për Zlatan Ibrahimovic. Ai shënon shumë gola, por mbi të gjitha ato janë mjaft të bukura. Ai është njëri prej tre sulmuesve më të mirë në botë, këtu nuk ka dyshim”, u shpreh Beckenbauer për të përditshmen franceze L' Equipe.

“Ndoshta ai do na befasojë me Topin e Artë, kush e di? Ai do ta meritonte atë. Por, mendoj se Ribery mbetet favorit për ta fituar”, deklaroi fituesi i Topit të Artë në vitet 1972 e 1976.