Beckenbauer: Bayern duhet ta mbajë Muller
Reagimi i tij ka ardhur pas zërave se sulmuesi së fundmi është kontaktuar nga Manchester United dhe pas deklaratës së Karl Heinz Rummenigge, se të pakënaqurit mund të largohen nga klubi bavarez.
Beckenbauer beson se bavarezët do të tregoheshin pa mend nëse do ta linin 24-vjeçarin që të largohej për në “Old Trafford”.
“Pasagjerët nuk mund të mbahen, por ata duhet të luftojnë që ta mbajnë Thomas Muller nëse ai ka në plan të largohet”, tha ai për “Bild”.
“Ai është një figurë vendimtare nën drejtimin e Pep Guardiola. Prandaj, ata duhet të bëjnë gjithçka për ta mbajtur dhe të shohin për një zgjidhje tjetër vetëm nëse ai refuzon kategorikisht të qëndrojë”, vijoi legjenda.
Bayern do të përballet me Borussia Dortmund në finalen e DFB Pokal më 17 maj dhe Beckenbauer thotë se Robert Lewandowski nuk duhet të përpiqet shumë për të befasuar klubin e tij të ri në prag të transferimit në “Allianz Arena”.
“Ai nuk duhet të sforcohet. BVB prej kohësh e ka pasur dobësitë e saj”, ka shtuar Beckenbauer.
