Munchen, 16 korrik - Mehdi Benatia është një ndër mbrojtësit më të kërkuar në merkaton e verës.

Marokeni u transferua sezonin e kaluar nga Udinese për tek Roma, dhe zhvilloi një sezon mjaft të mirë nën drejtimin e Rudi Garcias.

Tashmë ai është në qëndër të vëmendjes së shumë klube europiane te cilat kërkojnë të përforcojnë repartin prapavijës.

Klube si Manchester City, Barcelona , Chelsea apo Monaco kanë kohë që kanë shfaqur interes për 26 vjeçarin por së fundmi në luftë për Benatia janë futur edhe gjigandët gjerman të Bayernt të Mynihut.

Mediat italiane raportojnë sot se bavarezët janë gati ti ofrojnë Romës kartonin e kosovarit Xherdan Shaqiri dhe një shumë financiare në shkëmbim të Mehdi Benatia-s.

Kampionët e  Gjermanisë nuk e kanë patur si prioritet shitjen e djaloshit nga Gjilani por dëshira e lojtarit për të luajtur më shumë mund të bëjë që ai të jetë pjesë e kësaj tratative.

Nga ana tjetër klubi i Romës e ka bërë të qartë edhe më parë se kush kërkon shërbimet e marokenit duhet ti paguaje verdhekuqve 40 milion euro, por nëse Bayern përfshin Shaqirin në bisedime, ky i fundit pëlqehet shumë nga trajneri Garcia, atëherë klubi i kryeqytetit italian mund të jetë i gatshëm të fillojë tratativat me bavarezët.

Një tjetër fakt që të bën të mendosh se shkëmbimi Shaqiri-Benatia është më shumë se një spekulim merkatoje është se drejtori sportiv i Romës Sabatini tashmë i ka nisur kontaktet me menaxherin e futbollistit të kombëtares zvicerane.