Manchester, 9 dhjetor - Sipas shkrimeve të medieve britanike, gjiganti katalonas i futbollit Barcelona është e interesuar për ta sjellë sulmuesin holandez të Manchester Unitedit, Robin van Persie dhe këtë madje që në muajin janar 2014.

Lajmi për këtë doli në publik këtë vikend, pas humbjes së dy të rresht të Mançës në Old Trafford me rezultatin identik 0:1 (kundër Newcastle dhe Everton).

 Thuhet se van Persie është i pakënaqur me rolin e tij të ri në ekip, por edhe me metodat e stërvitjes së menaxherit David Moyes, sidomos shkaku i përgatitjes fizike joadekuate, gjë që iu shkakton lëndime më të shpeshta lojtarëve.

Barcelona, ndërkaq, në janar do të nisë gjetjen e një sulmuesi të pastër, sepse Gerardo  Martino, për dallim nga Pep Guardiola dhe Tito Vilanova, preferon të luajë me një qendërsulmues të vërtetë.

United hë për hë mohon se sulmuesi i tyre holandez është i pakënaqur në ekip, por mbase kur Barcelona të dorëzojë ofertën në tavolinë, kjo mund të ndryshojë mendimin.

Van Persie në dy sezonet e fundit ishte golashënuesi më i mirë në Premier League, por në këtë edicion ai ka shënuar vetëm shtatë gola, dyfish më pak se Luis Suarez te Liverpooli.