Madrid, 20 tetor - Karim Benzema, sulmuesi 25-vjeçar i Real Madridit dhe i kombëtares franceze, i cili në ditët e fundit kishte hyrë në radarët e Juventusit, tashmë duket një hap larg kalimit tek skuadra londineze Arsenal, madje qysh gjatë afatit kalimtar dimëror, pra në janar të vitit 2014.

Sipas zërave të publikuar në mediumet britanike, drejtuesit e klubit londinez janë të gatshëm të ofrojnë 45 milionë euro për të pasur në radhët e tyre sulmuesin francez.

Real Madrid mund të marrë vërtet në konsideratë një shifër të tillë, e cila mund të vihet përsëri në merkato për të përmbushur dëshirat e trajnerit Anceloti, transmeton panorama Plus.

Largimi i Benzemasë nga Bernabeu shihet si i pa shmangshëm, pasi kohët e fundit besimi tek ai ka rënë ndjeshëm. Andaj, një ofertë e tillë do të nxirrte jashtë loje edhe Juventusin pasi bardhe-zinjtë nuk mund të bëhen pjesë e një ankandi, në të cilin çmimi fillestar është 45 milionë euro.