Madrid, 8 tetor - Reali i Madridit ka pasur luhatje gjatë startit të sezonit, duke realizuar disa herë paraqitje bindëse dhe jo pak herë të tjera zhgënjyese.

Në fakt, Florentino Perez i ka dhënë garanci dhe mbështetje Carlo Ancelortit, për të vazhduar punën e nisur. 

Megjithatë, duket se skuadra ka ende nevojë për përforcime dhe drejtuesit kanë vendosur të shpenzojnë në janar. Pas një takimi mes presidentit dhe trajnerit, është vendosur se në cilat reparte do bëhen blerje, madje është folur edhe për emra specifikë.

David Silva – Pas largimit të Mesut Ozilit, Isko është i pazëvendësueshëm dhe nuk ka asnjë alternativë për pozicionin e tij. Kjo ka sjellë shumë probleme kur mesfushori ka qenë jashtë forme apo ka munguar, pasi Ançeloti është detyruar të fusë Moratën dhe ta ndërrojë skemën në 4-4-2.

David Silva shihet si përforcimi perfekt për këtë pozicion, sepse jo vetëm që do rivalizonte me Iskon për një vend në formacion, por do përshtatej edhe si mesfushor i majtë në rastet kur Cristiano Ronaldo do mund të aktivizohej si sulmues qendre.

Lojtari i Manchester Cityt e ka gjetur veten disa herë në stol tek anglezët këtë edicion, për shkak të rotacionit të shpeshtë të Manuelle Pellegrinit, ndaj nuk do ishte i pashitshëm. Problemi i vetëm qëndron te çmimi që i kanë vendosur “qytetarët”, të cilët duan plot 60 milionë euro për kartonin e tij.

Ramirez – Me largimin e Xabi Alonsos në janar, që sa vjen e bëhet një lajm akoma më i besueshëm, pritet një përforcim në qendër të mesfushës.

Duke qenë se Luka Modriq po bind si organizator, Ançeloti dëshiron një lojtar energjik si Ramirez, i cili jo vetëm do ishte një shkatërrues i shkëlqyer, por do ndihmonte edhe në ndërlidhjen mes repartit të mbrojtjes e mesfushës, pasi është i aftë të mbulojë mjaft mirë edhe detyrat sulmuese.

 Te Chelsea ai ka qenë stabël në formacion, por një ofertë prej 40 milionë eurosh do i tundonte jo pak blutë e Londrës.

Sulmuesi – Karim Benzema vazhdon të zhgënjejë. Edhe pse tekniku italian ia beson akoma formacionin, duket se i ka sosur durimi me francezin.

Listën e dëshirave për repartin e avancuar e kryeson Sergio Aguero, por që është edhe objektivi më i vështirë për t’u realizuar. Në rast se nuk arrihet një akord për të, alternativa janë Radamel Falcao dhe Luis Suarez.