Madrid, 6 dhjetor - Carlo Ancelotti arrin arrëveshjen me Real Madrid për rinovimin e kontratës që do ta zgjasë bashkëpunimin mes palëve deri në vitin 2017.

Lajmin e bën të ditur gazeta spanjolle \"Marca\", sipas së cilës, palët kanë gjetur pikën e përbashkët, duke mbyllur një kapitull që zgjat prej disa javësh pasi me ecurinë pozitive të dy sezoneve të fundit, \"Los Blancos\" dëshironin qëndrimin e teknikut italian edhe për të paktën 3 vjet në \"Santiago Bernabeu\".

Po sipas \"Marca\"-s, Reali parashikon ta zyrtarizojë marrëveshjen gjatë botërorit të klubeve që starton në datën 20 Dhjetor në Marok dhe ku ekipi spanjoll do të luajë për të fituar një tjetër trofe.

Ancelotti e mori drejtimin e skuadrës në fillim të sezonit të shkuar pas largimit të Jose Mourinhos me destinacion Chelsean.

Aktualisht Real Madrid kryeson klasifikimin e përgjithshëm, ndërsa një sezon më parë arriti të fitonte finalen e Champions League kundër Atletico Madrid dhe finalen e Kupës së Mbretit ndaj Barcelonës.