Barcelonë, 16 shtator - Mbrojtësi i Barcelonës, Jordi Alba, ka lavdëruar bashkëlojtarin e tij Lionel Messi pak orë para ndeshjes së Ligës së Kampionëve ndaj Romës, duke thënë se nuk ka futbollist tjetër që i afrohet atij – përfshirë edhe Cristiano Ronaldon.

Ylli i Real Madridit realizoi tetë gola në dy ndeshjet e fundit për ekipin e tij, por Alba e ka bërë të qartë se ai luan së bashku me lojtarin më të mirë në botë.

“Nëse tregohemi realistë dhe harrojmë besnikërinë për ekipin, ne nuk mund ta krahasojmë Messin me asnjë lojtar tjetër”, ka thënë Alba në konferencën për medie.

 “Më i miri në botë është Leo Messi”.  “Ronaldo është lojtar fantastik, ai shënon shumë gola dhe është i kompletuar, por çfarë bën Messi, nuk mund ta bëjë dikush tjetër. Kur Leo është në fushë, çdo gjë kthehet në favorin e Barçës. Ai është pesë hapa përpara tjerëve”.