Prishtinë, 29 janar - Evidencat që i ka mbajtur Spitali Turk i Zemrës (IMH) për të gjithë mjekët që i kanë referuar pacientët në shkëmbim të parave nga spitalet publike në këtë institucion, prokuroria i ka marrë si bazë për zgjerimin e hetimeve në rastin “Stenta”.

Janë mbi 110 mjekë, të cilët po hetohen për disa vepra penale, ndër to edhe marrje ryshfeti për referim të pacientëve në spitale private, shkruan sot Koha Ditore.

Një burim i ka thënë gazetës se arsyeja pse janë zgjeruar hetimet janë provat që kanë hasur në kompjuterët e konfiskuar të spitalit IMH.

Sipas këtij burimi, ky spital i ka evidencuar të dhënat për secilin mjek, me emër, datë të referimit dhe shumën e parave sa ua ka borxh spitali.

“Ata i kanë mbajtur listat në kompjuterët e punës për secilin mjek. Kur janë konfiskuar kompjuterët, prokuroria e ka gjetur këtë listë. Dhe në këto të dhëna është bazuar kur i ka zgjeruar hetimet”, ka thënë burimi, që deshi të mbetet anonim.

/Koha Ditore/