Prishtinë, 8 dhjetor - Institucioni i Avokatit të Popullit (IAP), bën lansimin e Raportit “Të drejtat në shëndetin seksual dhe riprodhues në Kosovë: Një realitet përtej ligjit\".

Ky Raport, i pari i këtij lloji, është rezultat i një vlerësimi të përgjithshëm dhe të thelluar përkitazi me të drejtat në shëndetin seksual dhe riprodhues, i cili vlerëson nëpërmjet thjerrës së garancive kushtetuese në vend, realitetin mbi të arriturat dhe ngecjet në këtë aspekt; vlerëson llogaridhënien e palëve përgjegjëse kundrejt obligimeve kushtetuese dhe ligjore sa i përket të drejtave në shëndet seksual dhe riprodhues; rekomandon për veprime, mbi bazën e të gjeturave për qëllimet e këtij Raporti  dhe mbështet realizmin e të drejtave në shëndet seksual dhe riprodhues në Kosovë.

Raporti është realizuar me mbështetjen teknike dhe financiare të Fondit për Popullsi të Kombeve të Bashkuara (UNFPA), si dhe me bashkëpunimin e autoriteteve publike gjegjëse, organizatave joqeveritare vendore dhe ndërkombëtare të profilit të çështjeve që trajton Raporti, si dhe profesionistëve të fushës.