Bogota, 23 janar - Zyrtarët në katër shtete amerikano-latine dhe Karaibe kanë paralajmëruar gratë që të shmangin shtatzënitë për shkak të asaj që quhet “epidemia e Zikas”, emri i virusit përgjegjës për deformimet gjenetike me të cilat po lindin gjithmonë e më shumë fëmijë.

Kolumbia, Ekuadori, El Salvadroi dhe Xhamajka rekomanduan gratë që të rishikojnë edhe njëherë planet e tyre për shtatzëni deri në kohën kur të kuptohet më tepër mbi Zikan.

Ministri kolumbian i Shëndetësisë, Alejandro Gabiviria kërkoi nga prindërit që të mos planifikojnë ndonjë shtatzëni, të paktën jo deri në shtator të këtij viti. Të njëjta këshilla dhanë edhe autoritetet shëndetësore në tre vendet e tjera.

Këto rekomandime pasojnë ato të Brazilit, vend në të cilin kanë lindur rreth 4 mijë fëmijë me deformime gjenetike që nga tetori i vitit të kaluar, ndërsa si përgjegjës shihet ky virus.

Edhe zyrtarët amerikanë të shëndetësisë kanë nxjerrë udhëzime të reja për gratë që mund të jenë ekspozuar ndaj virusit Zika, një infeksion që përhapet përmes mushkonjave dhe mund të shkaktojë dëme në zhvillimin e trurit të fetusit.

Qendra për Kontrollin dhe Parandalimin e Sëmundjeve nxori dje një paralajmërim se virusi përhapet përmes pickimit të mushkonjave dhe se nuk ka vaksina për ta parandaluar infeksionin, apo ilaçe për të kuruar sëmundjen.

Agjencia nxori paralajmërim për gratë shtatzëna që të shmangin udhëtimet në 14 vende të Amerikës Latine dhe Karaibeve ku është shfaqur virusi.

Sipas paralajmërimit, gratë shtatzëna janë më të rrezikuara nga infeksioni, i cili konsiderohet si shkaktar i mikrocefalisë, një anomali që shoqërohet me dëme në tru dhe përmasa më të vogla të kokës së foshnjës.

Brazili dhe Kolumbia kanë numrin më të madh të rasteve të diagnostikuara, por numri i personave të infektuar po shtohet edhe në vende të tjera.