Prishtinë, 23 mars - Prishtina International Film Festival këtë vit mundëson një tjetër aktivitet kushtuar filmbërësve të rajonit, Prishtina Rendezvous - një aktivitet që do fokusohet tek distributorët dhe agjentët ndërkombëtar të shitjes së filmit.

Prishtina Rendezvous është aktiviteti më i ri i cili do zhvillhet në kuadër të Platformës Rajonale Të Industrisë së Filmit, PriFORUM, gjatë Prishtina International Film Festival.

Prishtina Rendezvous është aktivitet një-ditor që do mbahet me distributorë dhe agjentë ndërkombëtarë të shitjes së filmit, të cilët do vijnë pikërisht për t’u njohur me talentet e rajonit.

Kompani më të njohura të shitjes së filmit nga Franca Memento Films, Indie Sales, Le Pacte, Loco Films si dhe kompanitë e distribuimit nga Italia Fandango dhe The Open Reel, dhe ato nga Gjermania Neue Visionen dhe Pluto Films,  janë ata që tashmë kanë konfirmuar pjesëmarrjen e tyre.

Të gjitha këto kompani do të ndjekin përsëafërmi seancën e prezentimit Best Pitching gjatë dates 24 prill në PriFORUM, ku do të prezentojnë të përzgjedhurit nga Maqedonia, Serbia, Mali i Zi, Shqipëria, Kosova, Bosnja dhe Kroacia. Ata fillimisht do dëgjojnë prezantimet, më pas seancat do zhvillohen në formën e takimeve kokë-më-kokë midis pjesëmarrësve dhe distributorëve e agjentëve te shitjes.

Vjosa Berisha, Drejtor Festivali e Prishtina International Film Festival, u shpreh shumë entuziaste për faktin që festivali po shton gjithmonë e më shumë aktivitetet të cilat mbështesin zhvillimin e kinematografisë duke ndihmuar industrinë e filmit në vend:

“Mendoj se ky është ndër aktivitetet kryesore që kemi arritur të realizojmë gjatë këtij edicioni, aktivitet i cili ka tërhequr kompani shumë të rëndësishme për të vizituar Kosovën dhe Prishtina International Film Festival. Kineastët tanë nga Kosova dhe shumë të tjerë nga rajoni kanë mundësi të limituara për të vizituar festivalet e mëdha për shkak të kostove dhe, në rastin e Kosovës, gjithashtu për shkak të restrikcioneve të vizave.\"

\"Edhe në rastet kur ata arrijnë të prekin tregjet e mëdha të filmit si ai i Kanës apo European Film Market, është e vështirë për të tërhequr vëmendjen e këtyre kompanive, duke qenë se ata kanë të tjera përparësi dhe një axhendë shumë të ngjeshur. Përmes këtij aktiviteti, ne do të arrijmë të sjellim vëmendjen e këtyre kompanive pikërisht në festivalin tonë, ata do qëndrojnë këtu përgjatë fundjavës për t’u njohur dhe për të dëgjuar projektet e talenteve nga Kosova dhe të rajonit.\"

\"Nëse ata nuk arrijnë të realizojnë menjëherë një marrëveshje, përsëri është shumë e rëndësishme që biseda rreth projektit të nisë këtu në mënyrë që të ketë mundësi për t’u zhvilluar më tej në vijimësi. Së shpejti do i mirëpresim këto kompani në Prishtinë për ta nisur së bashku Prishtina Rendezvous, dhe në këtë mënyrë të forcojmë marrëdhënien midis filmbërësve, distributorëve dhe agjentëve të shitjes. Tek e fundit, të gjitha marrëdhëniet nisin me nje Rendezvous, apo jo?” u shpreh Zonja Berisha.

Prishtina International Film Festival do zhvillojë edicionin e tij të 8-të këtë vit, gjatë muajit Prill, dhe PriFORUM – Platforma Rajonale e Industrisë së Filmit do zhvillohet gjatë datave 23-27 Prill, duke sjellë shumë profesionistë të rëndësishëm të filmit, producentë, regjisorë dhe distributorë, nga rajoni dhe Europa, pikërisht në Kosovë, për t’u njohur dhe për të krijuar një rrjet bashkëpunimi.

Shumë workshop-e, sesione, leksione dhe master klasa janë pjesë e programit të kësaj jave, ndaj vizitoni faqen zyrtare të festivalit dhe faqen në facebook për të qëndruar të përditësuar.

Gjithashtu vizitoni www.prifest.org për të marrë akreditimin për festivalin dhe për të përfituar akses në shumë prej aktiviteteve dhe shfaqjen e filmave të gjitha gratis. Që nga tani në faqen e PriFest do gjeni edhe ndihmë përsa i përket akomodimit në Prishtinë gjatë ditëve të festivalit.