Prishtinë, 3 prill -  Këngëtarja Naxhije Fejza, e cila në vitet e fundit është shumë e pranishme në shumë koncerte dhe aktivitete muzikore, së shpejti do ta sjellë në tregun muzikor një album me këngë “live”.

Fejza ka bërë me dije se ky album do të ketë këngë të ndryshme. “Unë i kam disa plane. Po punoj sa më shumë ta sjell albumin me këngë ‘live’, si dhe do të paraqitem si kantautore me një baladë”, ka theksuar ajo, duke shtuar se beson dhe shpreson se albumi do të pritet dhe pëlqehet nga adhuruesit e saj, të cilët, sipas saj, janë të shumtë në të gjithë hapësirën shqiptare, por edhe në Evropë, Amerikë e vende të tjera.

“Muzika që unë këndoj nuk mban ngjyrë të huaj sepse ne si familje e kemi në zemër muzikën e pastër shqipe dhe kjo besoj se do të vazhdojë në të gjithë karrierën time muzikore”, ka thënë ajo për gazetën “Epoka e re”. Fejza, e cila merr pjesë në shumë koncerte në të cilat këndohet shqip, ka thënë se kudo që ajo këndon e kalon mirë. (Adifete BELA).