Hollywood, 31 mars- Miranda është padyshim në një rrugë njëkahëshe drejt suksesit, e kjo u dëshmua edhe me karrierën e saj të bujshme në shumë drejtime, të cilës tani do t’i shtohet edhe një tjetër. Pas një viti të luhatshëm, 30-vjeçarja është kthyer më e fuqishme se kurrë.

Vetëm këtë vit Miranda ka arritur marrëveshje të reja me shtëpinë gjermane të modës ‘Escada’, me kompaninë e madhe të veshjeve ‘H&M’, me kompaninë e filxhanëve të çajit ‘Royal Doulton’, me prodhuesin e veshjeve të brendshme ‘Wonderbra’ dhe me kompaninë e madhe ‘Reebok’. Dhe sikur kjo të mos mjaftonte, ajo ka hyrë edhe në biznesin muzikor duke bërë një këngë me yllin e ‘Broadway’-it, Bobby Fox.

Tani ajo planifikon që të hyjë edhe në aktrim. Si duket një producent ka parë një audicion të saj dhe e ka krahasuar me Cameron Diaz-in. Përkundër tërë këtyre angazhimeve, bukuroshja brune, në fakt, tha që ajo e ka zvogëluar orarin e punës brenda javës nga gjashtë ditë në tri, për t’i qëndruar afër djalit.