Mbi 5 milionë euro janë investimet e huaja në filmat kosovar
Sipas statistikave të QKK-së në filmat kosovar të metrazhit të gjatë në vitin 2014 janë investuar rreth 5 milionë euro duke i përfshirë këtu edhe filmat të cilët në QKK janë mbështetur si projekte minore.
Filmi me buxhetin më të lartë është “Babai” me skenar dhe regji nga Visar Morina e që nga QKK është mbështetur me 200 mijë euro ndërsa nga fondet gjermane dhe maqedone ka siguruar 1.4 milion euro. Ky film pritet të jepet premierë së shpejti.
Gjithashtu filmi “Tri Dritare dhe Një Varje” me skenar nga Zymber Kelmendi dhe regji nga Isa Qosja, i mbeshtetur nga QKK me 250 mije euro ka gjetur mbështetje edhe në Gjermani me 80 mijë euro.
Ndërsa filmat “Kthimi” me skenar nga Kastriot Abdyli dhe Isa Qosja e me regji nga Kastriot Abdyli dhe “ Pranverë e paharruar në fshatin e harruar” me skenar dhe regji nga Kushtrim Bekteshi përveç QKK-së janë financuar edhe Fondet Maqedonase me rreth 400 mijë euro.
Drejtori i QKK-së Arben Zharku u shpreh: “Bashkëpunimet me fondet e tjera rajonale si dhe fakti që QKK është prezente në tregjet kryesore botërore të filmit si në Cannes, Berlin, LA etj. i kanë bërë filmat kosovar të hapur për botën. Këto 4 vitet e fundit me praninë e QKK-së në tregje të ndryshme është rritur dukshëm interesi i producentëve të huaj që të investojnë në filmat tanë. Shpresojmë që kjo rritje të dyfishohet me futjen e lehtësirave financiare që pritet të ndodh nga viti 2016.”
Gjithashtu rreth 50 mijë euro janë investuar nga fondet e huaja në filmat e shkurtër dhe dokumentarë.
Më poshtë mund t’i shihni shifrat e filmave të mbështetur nga QKK bashkë me investimet e tjera.
- TRI DRITARE DHE NJE VARJE: 80,000.00 Euro - (QKK 250,000.00)
- BABAI: 1,400,000.00 EURO - (QKK 200,000.00)
- HOME SWEET HOME: 50,000.00 (QKK 150,000.00)
- KTHIMI: 200,000 EURO (QKK 67,000.00)
- PRANVERË E PAHARRUAR NË FSHATIN E HARRUAR: 270,000.00 (QKK 60,000)
- BOTA: 730,000.00 EURO - (QKK 50,000.00)
- BURRNESHAT: 1,180.000.00 EURO – (QKK 50,000.00)
- ENGJEJT JANË LARG: 450,000.00 EURO – (QKK 140,000.00)
- GOLD: 200,000.00 – (QKK 50,000.00)
- SEPTEMBER: 200,000.00 (QKK 49,000.00)
- Y-ELEPHANT: 300,000.00 (QKK 50,000.00)
TOTAL I INVESTIMEVE TË FONDEVE TË HUAJA: 5,060,000.00 EURO
