Prishtine, 20 maj - Shkolla e Muzikës Misbah & Friends dhe Rotary Club Prishtina, organizuan  sot Konferencë për Media, ku shpalosën programin e Festivalit të Muzikës dhe Artit për fëmijë “El Maestro, festival ky i cili organizohet për herë të dytë në Kosovë.

Drejtoresha e këtij festivali znj. Jeta Dumnica, në konferencë për media shpalosi programin e këtij festivali dhe konfirmoi që nata e parë do të filloj këtë të shtunë ne ora 19:00, në Teatrin “Faruk Begolli” në Kolegjin AAB dhe do të vazhdojë për tetë ditë me radhë.

Gjithashtu, ajo shtoi se “Festivali “El Maestro” ka për qëllim afrimin dhe shkëmbimin e përvojave të artistëve të vegjël, mësimdhënësve dhe institucioneve arsimore ne Kosovë.  Po ashtu qëllimi i këtij festivali është që të sjell në skenë talent nga fusha të ndryshme të artit dhe muzikës, duke filluar nga balerinët, instrumentistët, kori e deri tek piktorët e talentuar”

Ndërkaq drejtoresha e Rotary Club Prishtina, znjsh. Agnesa Vuthaj shpjegoi që Rotary Club Prishtina këtë vit aktivitetet e saj i ka orientuar që të ndihmohen fëmijët ne nevojë dhe ky festival është në të kuadër të këtyre aktiviteteve.

Znjsh. Vuthaj tha se ”kauza për të cilën organizohet ky festival është që ti dilet në përkrahje Strehimores Shpresa dhe Shtëpive të Fëmijëve SDSF e cila ofron strehim të përkohshëm për fëmijët pa kujdes prindëror, viktimat e dhunës në familje, fëmijët e abuzuar dhe viktimat e trafikimit të nivelit të ulët të rrezikut nga tërë Kosova”

Forma e grumbullimit të mjetë që do t’ju shkojnë në ndihmë këtyre fëmijëve do të bëhet përmes shitjes së broshurave para dhe gjatë festivalit, bënë të ditur organizatorët.