Kaçanik, 11 nëntor - CHwB (Fondacioni suedez Trashëgimia Kulturore pa Kufij) dhe Komuna e Kaçanikut do të rindërtojnë objektin e rrënuar të Kullës së Hasanit mbi fshatin Bob. Projekti do të realizohet në kuadër të marrëveshjes që kanë nënshkruar Komuna e Kaçanikut dhe CHwB-ja për trashëgimi kulturore, përkatësisht zbatimin e një programi të financuar nga Suedia i cili ka për qëllim mbrojtjen dhe promovimin e trashëgimisë kulturore gjatë periudhës 2013 – 2015.

Enes Toska, menaxher i projektit Trashëgimia Kulturore pa Kufij (CHwB) gjatë takimit me kryetarin e Komunës, z. Besim Ilazi, ka thënë se programi i CHwB-së përfundon më 31 dhjetor të këtij viti, ndërsa kanë mbet të realizohen edhe dy projekte: Rindërtimi i Kullës së Hasanit dhe Faza e dytë e revitalizimit të Kalasë së qytetit. Në takim është thënë se objekti i Kullës së Hasanit do të ndërtohet me material të fortë, gurë e tulla duke ruajtur formën e mëhershme, ndërsa rindërtimi do të fillon sivjet dhe do të përfundon vitin e ardhshëm.

Për rindërtimin e objektit do të shpenzohen gjithsej 26,000 euro prej të cilave CHwB-ja do të dhuron 10,000 euro dhe Komuna e Kaçanikut 16,000 euro të tjera. Kryetari Ilazi ka thënë se ne jemi të vetëdijshëm se pas përfundimit të objektit, mbesin edhe shumë punë për tu bërë aty, andaj për vitin 2016 kemi planifikuar një fond për investime në projektet e trashëgimisë kulturore. Në takim ishin të pranishëm edhe drejtorët komunal, Fatos Koxha, Bahri Selimi e Enver Kamishi dhe Fatlume Guri, koordinatore e FLTK (Forumit Lokal për Trashëgimi Kulturore) e Fatmir Çaka, anëtar i FLTK-së.

Kulla e Hasanit, gjatë luftës së Ushtrisë Çlirimtare të Kosovës ishte në shërbim të Shtabit të Brigadës 162 “Agim Bajrami”, ndërsa pritet të ngrejë shtat rishtas prej guri.