Pejë, 17 qershor - Nga kjo e Premte në ora 20:00 fillon shfaqja e filmave në kinemanë e qytetit “Jusuf Gërvalla”.

Qytetit të Pejës në 20 vitet e fundit i ka munguar një kinema funksionale që lëshon filma gjatë gjithë vitit. Megjithatë duke filluar nga e premtja dhe në muajin në vazhdim kjo do të ndryshoj, filmat që do të shfaqën këtë muaj janë iniciativë e organizatës \"Anibar\" për rivitalizimin e kinemasë së vetme të qytetit të Pejës, kinemasë ‘Jusuf Gërvalla”.

Anibar, si pjesë e Rrjetit të Organizatave të Kulturës në Pejë dhe e Forumit Kulturor të Kosovës është pjesë e përpjekjeve të përbashkëta lokale dhe nacionale për zhvillimin e kulturës dhe funksionalizimin e hapësirave kulturore, veqanërisht kinemave.

Përkundër vështirësive, pasi që Kinemaja Jusuf Gërvalla për momentin nuk e posedon teknologjinë e standardizuar digjitale DCP për shfaqje të filmave më të rinjë, por ka të instaluar projektor me shirit 35mm që është teknologji e vjetruar pasi që nga viti 2013 nuk prodhohen filma me këtë standard, Anibar është e vendosur në digjitalizimin e kinemasë, me teknologjinë DCP me çka jo vetëm që do të ju ofroj qytetarëve të Pejës të shohin filmat më të fundit por po ashtu do të na mundësoj që të shfaqim filma në formatin 3D.

Me qëllim të funksionalizimit të kinemasë së qytetit, shfaqjes së filmave në mënyrë të vazhdueshme dhe në orare të ndryshme, për të nxitur qëndrueshmëri financiare të kinemasë, dhe për të ngritur numrin dhe cilësinë e aktiviteteve kulturore në qytetin e Pejës, ftojmë të gjithë qytetarët e Pejës që ta përkrahin këtë iniciativën për rivitalizimin e kinemasë “Jusuf Gërvalla” duke vizituar kinemanë sa më shpesh.