Prishtinë, 24 shtator - “September” i regjisorit Darijan Pejovski është koproduksion i Maqedonisë me Kosovë i cili ka filluar xhirimet pikërisht në muajin që mbanë dhe titulli i filmit.

Me skenar të Darijan Pejovskit dhe Igor Ivanov, filmi është një triller psikologjik që merret me pasojat e dhunës familjare dhe seksuale. Jana dhe Marika takohen në një tren dhe shpejt bëhen mike.

Ato shkojnë në fshat, në një zonë të largët malore që mban shumë sekrete për Janën. Koha lëviz ngadalë dhe me padurim, dyshimet ashtu si dhe qëllimet e tyre bëhen më të forta.

Të fshehtat bien një nga një. Marika është vrasëse në arrati ndërsa Jana është në një mision për hakmarrje. Nuk kanë rrugë tjetër përveçse ta ndihmojnë njëra-tjetrën.

Në këtë film luajnë: Irena Ristic, Kamka Tocinovski, Adem Karaga, Salaetin Bilal, Milica Stojanova, Kiril Korunovski, Mentor Zymberaj, Blerim Qeriqi, Fatos Kryeziu etj. Gjuha e folur në film është gjuha maqedonase dhe shqipe.

“September” është i mbështetur nga Agjencia e Filmit të Maqedonisë dhe Qendra Kinematografike e Kosovës, është prodhim i Skopje Film Studio dhe “IKONE STUDIO” me producent Tomi Salkovski dhe Valon Bajgora.

Premiera e filmit pritet të mbahet në janar të vitit 2015, me ambicie që të vazhdoj shfaqjen në festivale të ndryshme ndërkombëtare.