Basel , 20 tetor - Festivali prestigjioz i kulturës, CulturesScapes është hapur në Basel të Zvicrës. Në këtë edicion do të prezantohet kultura nga Ballkani. Në mbrëmjen e hapjes kanë performuar edhe Kori i shkollës së muzikës ‘Prenk Jakova’ nga Gjakova.

Ministri i Kulturës, Rinisë dhe Sportit, Memli Krasniqi ka qenë një ndër të ftuarit për të hapur këtë festival. MKRS është një nga mbështetësit kryesor të këtij edicioni.

Duke e vlerësuar si shumë të rëndësishëm këtë festival, Ministri Krasniqi tha se ky edicion është mjaft i veçantë pasi prezanton një regjion me tetë shtete, të cilat vijnë me shumë dallime por në të njëjtën kohë edhe më shumë ngjashmëri. CultureScapes, tha ministri Krasniqi, është një vendtakim ku tejkalohen kufijtë dhe njerëzit afrohen përmes artit.

Kosova dhe Zvicra, e në veçanti qyteti i Baselit, theksoi ai, kanë lidhje të kamotshme. Ministri Krasniqi tha se në këtë qytet shumë të rinj nga Kosova kanë treguar shembull dhe janë bërë imazh i rëndësishëm i Zvicrës por edhe Kosovës. Në këtë kontekst ai përmendi sportistët nga Kosova Xherdan Shaqiri e Granit Xhaka, Arnold Gjergjaj e shumë të tjerë.

“Ne jemi për atë se këto lidhje të forta dhe shembull për zgjerim edhe në fusha të tjera e sidomos në kulturë”, tha ai.

Ministri tha se shpesh ka qenë politika ajo që në Ballkan ka theksuar dallimet, por ka shtuar se tashmë të gjithë po punojnë që e ardhmja të ndërtohet duke promovuar dallimet si vlerë bashkuese.

“Qeveria e Kosovës po punon shumë që të mbështesë artistët që të promovojnë punën e tyre e kështu edhe gjithë skenën tonë kulturore, për të kontribuar sa më shumë në lidhjen mes njerëzve dhe vendeve”, tha ai.

Në ceremoninë e hapjes kanë folur edhe përfaqësues të institucioneve qeverisëse në Basel si dhe drejtues të festivalit CultureScapes.

CultureScapes llogaritet si një nga festivalet me të rëndësishme të kulturës në Zvicër por edhe në Evropë. Në çdo vit ky festival organizon edicion për skenën kulturore të një vendi ose regjioni të caktuar.