Nju Jork, 15 prill - Ky “shpërblim” është dhënë për shkrimet mbi përgjimet e NSA-së, mbështetur në dokumentet e siguruara nga ish-nëpunësi i Cia-s, Edward Snowden.

Çmimi më i rëndësishëm për gazetarinë “Pulitzer”, i është dhënë dy gazetave prestigjioze: njëri për amerikanen “Washington Post” dhe tjetri për britaniken “The Guardian”. Ky “shpërblim” është dhënë për shkrimet mbi përgjimet e NSA-së, mbështetur në dokumentet e siguruara nga ish-nëpunësi i Cia-s, Edward Snowden.

Komiteti “Pulitzer” argumentoi se “The Guardian”, ndihmoi që, përmes raportimit agresiv, të nxiste debatin për marrëdhëniet mes qeverisë dhe publikut, për çështjet e sigurisë dhe privatësisë, citon “KosovaPress”.

Ndërsa për “Washington Post”, theksoi se, shkrimet që mbanin vulën autoritare dhe depërtuese, ndihmuan publikun të kuptojë se si zbulimi përshtatet në kornizën e madhe të sigurisë kombëtare.

Mes fituesve të çmimit më të madh në gazetarinë amerikane ishte “Boston Globe”, në kategorinë “breaking news”, për sulmet me bomba në maratonën e Bostonit, si dhe gjurmimin e të dyshuarve.

Për raportimin ndërkombëtar u vlerësuan dy gazetarë të agjencisë së lajmeve “Reuters”; Jason Szep dhe Andrew R.C. Marshall, për “raportimin e guximshëm për persekutimin e dhunshëm të Rohingias, pakicës myslimane në Mianmar, që në përpjekje për t’u larguar nga vendi, bie viktimë e rrjeteve të trafikimit të qenieve njerëzore”.

Ndërsa Taylor Hicks i “New York Times” fitoi foto-lajmin e fundit për sulmin terrorist në qendrën tregtare Westgate në Kenia.

Çmimi “Pulitzer” jepet nga Fakulteti i Gazetarisë i Universitetit të Kolumbisë.