Prishtinë, 18 tetor - Komuna e Prishtinës në bashkëpunim me Fondacionin Kosovar të Arkitekturës, hapi ekspozitë me punimet që kanë konkurruar për çmimin “Rexhep Luci”, në konkursin “Ide për Prishtinën” që u mbajt në kuadër të Javës së Arkitekturës (Prishtina Architecture Week ).

Kryetari i Komunës së Prishtinës, Shpend Ahmeti me këtë rast tha se është kënaqësi që të hapet ekspozita e parë çmimit “Rexhep Luci”, që tani e tutje do të organizohet çdo vit.

Çmimi “Rexhep Luci” do të organizohet me qëllim të promovimit të arkitektëve të rinj si dhe do të propozojë në të njëjtën kohë zgjidhje për qytetin e Prishtinës.

\"Ndonëse në një datë pikëllimi, ne kemi vendosur që pikërisht na datën e ndarjes nga jeta të arkitektit të ndjerë, Rexhep Luci, pra datën 11 shtator ta marrim si shkas duke marrë parasysh që Rexhep Luci ka qenë një prej arkitekte dhe luftëtarëve kryesorë që janë munduar që në fillim të viteve të pasluftës ta luftojë degradimin e kryeqytetit, pasojat e të cilës i shohim edhe sot.\"

\"Edhe pse kjo mund të konsiderohet si një betejë e humbur, megjithatë, ajo betejë e humbur është frymëzim për të gjithë të tjerët, për të gjithë ne që kemi nisur betejën e re për ndaljen e degradimit të mëtutjeshëm të planit urbanistik të qytetit,” tha kryetari Ahmeti, i cili u shpreh së i ndjeri z. Luci do të përkujtohet për sakrificën e tij çdo vit nëpërmes çmimit që do të ndahet në emër të tij.

Konkursi ka për qëllim që arkitektët të ofrojnë zgjidhje një pjesë të qytetit. Sivjet, tema e konkursit ka qenë e përgjithshme ku arkitektët kishin mundësinë të prezantojnë ide dhe projekte të ndryshme, ndërsa çmimi i parë do të zbatohet në praktikë nga Komuna e Prishtinës. Gjatë viteve të ardhshme, temat e konkursit për çmimin “Rexhep Luci” do të caktohen paraprakisht.

Vendi i tretë në këtë konkurs i takoi arkitektes Zana Sokoli, ndërsa me çmimin e dytë u vlerësua punimi i Erblin Bucaliu. Fitues i konkursit të parë “Rexhep Luci” u shpall punimi i arkitektit Bruk Jonson. Fituesit ishin shpallur me datën 11 shtator 2014, ndërsa të premten 17 tetor 2014 u hap ekspozita me punimet e tyre.

Të pranishëm në këtë ekspozitë ishin edhe familjarët e arkitektit të ndjerë, Rexhep Luci.

Ekspozita do të qëndrojë e hapur deri më 24 tetor 2014.