Prishtinë,  9 mars - Sukseset e filmave kosovar nuk kanë të ndalur duke rrëmbyer çmimet ndërkombëtare, i fundit që ka fituar çmimin në “Fame’us Platinum Award /Feature film”, është filmi AGNUS DEI me skenar dhe regji te Agim Sopit.  

“Filmi AGNUS DEI me skenar dhe regji te Agim Sopit, është shpallur fitues i çmimit kryesor Fame’us Platinum Award /Feature film në përmbylljen e FAME’US Internaional Film Festival – Hollywood, California”, ka bërë të ditur përmes një komunikate autori i filmit.

FIFF është njëri ndër festivalet më glamuroze të Hollywoodit dhe organizon evente në disa kategori si: Film Fest, Fashion Fest & Music Fest. Në fund të çdo viti kalendarik, nga të gjithë fituesit e të gjitha festivaleve, shpallet edhe fituesi absolut i vitit. Ditë më parë, filmi Agnus Dei ka marrë ftesa për të qenë pjesë e programeve zyrtare edhe në disa festivale, thuhet në komunikatë.

Ai po ashtu ka thënë se në fund të muajit mars, Agnus Dei do të hap Iceland International Film Festival, i cili mbahet në Reykjavik, kryeqytetin e Islandës,  për të vazhduar në  Las Vegas Galaxy International Film Festival – Las Vegas, Singapore International Film Festival, Future International Film Festival në Melbourne, Los Angeles International Film Festival – Los Angeles, Coral Coast International Film Festival – Sardinia, etj.   

Me këto suksese, Agnus Dei radhit pas vete 65 çmime ndërkombëtare, të fituara në të katër anët e globit, duke qenë pjesë zyrtare e më shumë se 150 festivaleve.