Prishtinë, 7 mars - Ministri i Kulturës, Rinisë dhe Sportit, Kujtim Shala, ka takuar sot një grup prej 30 studentësh nga Departamentet i Antropologjisë nga Fakultetit i Filozofik i Universitetit të Prishtinës, të cilët nga sot do të fillojnë praktikën 3 deri në 6 mujore në institucionet e trashëgimisë kulturore që veprojnë në kuadër të MKRS-së.

Kjo vjen si rezultat i Memorandumit të Bashkëpunimit, të cilin MKRS-ja e ka nënshkruar me fakultetin përkatës në vitin e kaluar. Në kuadër të këtij memorandumi, parashihen një sërë aktivitetesh, si trajnime, konferenca, seminare dhe botime që për synim kanë hulumtimin, ruajtjen dhe afirmimin e trashëgimisë kulturore të Kosovës.

Ministri Shala i përgëzoi studentët dhe iu uroi punë të mbarë, dhe njëkohësisht iu premtoi përkrahjen dhe mbështetjen e institucioneve të kulturës në rrugën e formimit dhe ngritjes së tyre të mëtejme profesionale. Ai po ashtu u shpreh se trashëgimia kulturore dhe shpirtërore e Kosovës, janë tejet me rëndësi për të ndërtuar Kosovën e së nesërmes dhe në këtë synim, brezi i ri, ka një rol fondamental.

Ministri Shala u shpreh i gatshëm për të bashkëpunuar me Departamentin e Antropologjisë, si një ndër departamentet e vetme të kësaj fushe në gjuhën shqipe, ku studimet themelore janë studimi i kulturës dhe trashëgimisë kulturore.

Ai më tej u shpreh se institucionet e Kosovës, trashëgiminë kulturore e kanë prioritet të veçantë, ndaj edhe po investohet në shumë aspekte për të gjurmuar, konservuar dhe promovuar, gjithnjë në funksion të ruajtjes edhe të diversitetit kulturor.

Ministri Shala gjithashtu u shpreh se MKRS-ja do të mbështes studentët e Degës së Antropologjisë edhe në të ardhmen, që ata të mos mbesin pa praktikë, dhe njëkohësisht iu premtoi bashkëpunim në krijimin e programeve të reja profesionale në bashkëpunim me institucionet dhe po ashtu në trajnime dhe shkollime nëpër Evropë.