Pogradec, 7 nëntor - Një tragjedi e rëndë ka ndodhur në qytetin e Pogradecit, gjegjësisht në minierën e fshatit Beragozhd.

Siç mëson agjencia e lajmeve INA, pesë të rinj nga një trung familjar, në rrethana akoma të pazbardhura, kanë humbur jetën në minierën e fshatin Beragozhd, komuna Dardhas në qytetin e Pogradecit.

Viktimat janë tre vëllezërit Edison, Ledjon dhe Nertil Hamolli, përkatësisht 23, 24 dhe 25 vjeç. Gjithashtu, kanë humbur jetën edhe dy vëllezërit Sazan dhe Arjan Hamolli, kushërinj me tre të parët.

Të rinjtë ishin futur në minierë për të nxjerrë skrap. Dyshohet se shkak i vdekjes së të rinjve është bërë një gjenerator, me anë të të cilit vihej në punë një pompë që shërbente për nxjerrjen e ujit jashtë minierës. Tymi i gjeneratorit dyshohet t’i ketë asfiksuar të rinjtë.

Policia dhe shtabi i emergjencave ka mbërritur në vendngjarje, ndërsa pritet mbërritja e grupit të kërkim-shpëtimit për nxjerrjen e viktimave të tjera.

Deri tani është bërë e mundur nxjerrja e trupit të pajetë të Edisonit dhe Nertil Hamollit, 25 vjeç.