Prishtinë, 19 gusht - Reduktimet e ashpra të ujit të pijshëm në kryeqytet po e pengojnë kryetarin e Prishtinës, Isa Mustafa, i cili thotë se edhe vetë  po përballet me mungesë uji.

Për mosrealizimin e projektit për furnizimin me ujë pa ndërprerë Mustafa akuzon ujësjellësin “Prishtina” që, sipas tij, po i vonon punimet në ndërrim të gypave.

Ky institucion, sipas tij, me qëllim e la “Bregun e Diellit” dy ditë pa ujë, kur pati prishje në një gyp.

Krejt kjo, sipas tij, ngase ujësjellësi që menaxhohet nga niveli qendror po punon në baza partiake, konkretisht se udhëhiqet nga PDK-ja.

KTV ka tentuar të kontaktojë me drejtorin e ujësjellësit, Xhelosh Vataj, por ai është përgjigjur nëpërmjet zëdhënëses Arjeta Mjeku, duke thënë se edhe përfaqësues të LDK-së kanë votuar pro emërimit të tij.

Pos tjerash, ajo ka thënë se ujësjellës është në shërbim të qytetarëve dhe se e ka rregulluar gypin në Bregun e Diellit për dy ditë dhe se nuk ka pasur mundësi që  kjo të ndodhë më shpejt.