Prishtinë, 19 korrik - Punëtorët e gjigandit metalurgjik Trepça prej të martës kanë ndërprerë punën e tyre të përditshme. Ata kanë lënë horizontet e minierës dhe jashtë tyre kanë filluar grevën.

Greva e minatorëve të Trepçës ka ardhur pas emërimit nga Agjencia Kosovare e Privatizimit në postin e Ushtruesit të Detyrës së Drejtorit të Trepçës të Eset Ujkanit.

Zëdhënësi i kësaj ndërmarrje Bislim Muça tha për Radion Evropa e Lirë se edhe në ditën e enjte minatorët e Trepçës janë duke qëndruar në grevë.

 “Greva është duke vazhduar edhe më tutje, punëtorët janë këmbëngulës në kërkesat e tyre, presim që gjatë ditës së sotme të iu drejtohet dikush nga institucionet e qeverisë apo nga Agjencia Kosovare e Privatizimit”, tha ai.
 
Javën e kaluar dha dorëheqjen nga ky post Ferat Shala, me arsyetimin e angazhimit akademik.
 
Përfaqësuesit e sindikatës së minatorëve kanë tri kërkesa të cilat presin të përmbushen. Ata kundërshtojnë emërimin e Eset Ujkanit në postin e ushtruesit të detyrës së drejtorit, dhe deri në zgjedhjen e menaxherit të ri sipas tyre duhet të emërohet dikush nga njohësit e minierave, duke përmendur emrat e Halil Qelës, Beqir Maliqit ose të Miftar Hysenit.
 
Po ashtu, ata kërkojnë ardhjen e kryeparlamentarit Jakup Krasniqi në këtë vend për t’iu treguar se çfarë do të ndodhë me Trepçën; dhe po ashtu edhe ndonjë zyrtarë të Qeverisë dhe ish-drejtorin Ferat Shala.
 
Sipas Nezir Behramit, kryetar i Sindikatës së Punëtorëve, nëse këto kërkesa nuk përmbushen deri në përfundim të ditës së mërkurë, do të diskutohet ndryshimi i formës së protestës.
 
“Do të presim edhe sot. Kemi informata se janë duke punuar në atë drejtim. Nëse nuk marrim përgjigje atëherë do të shqyrtojmë se cfarë do të bëjmë më tutje. Brenga jonë kryesore është se dikujt po i pengon puna që po zhvillohet në Trepçë. Dikujt po i pengojnë rezultatet që po jepen në Trepçë, edhe me një nguti kaq të madhe do që të bëjë një destabilizim të Trepçës dhe të çojë në falimentim apo privatizim, që për ne është e papranueshme”, tha Nezir Behrami, Kryetar i Sindikatës së Punëtorëve “Trepça”.
 
Sipas Behramit janë mbi 700 punëtorë që kanë ndërprerë punën, dhe se atyre u janë bashkangjitur edhe minatorët e Artanës dhe Kishnicës.