Lehtësirat fiskale parakusht për nxitjen e industrisë së prodhimit
Ky ishte konkludimi i një takimi të mbajtur sot mes drejtuesve të Odës Ekonomike të Kosovës, Safet Gërxhaliu, dhe Odës Ekonomike Amerikane në Kosovë, Arian Zeka.
Drejtuesit e dy organizatave më të mëdha të biznesit në vend shprehën shqetësimin e tyre për pozitën e vështirë dhe aspak konkurruese në të cilën ndodhen prodhuesit vendor.
Një gjë e tillë, përpos që pamundëson rritjen e punësimit, ka shkaktuar një deficit tregtar tejet të lartë, duke e shndërruar vendin në eksportues të parasë së gatshme.
Duke pasur parasysh këtë, ata i bënë thirrje Ministrisë së Financave që në periudhë sa më të shpejtë të inicojë ndryshimet e duhura ligjore për të jetësuar vendimet për krijimin e lehtësirave fiskale përfshirë këtu edhe pushimet tatimore për investitorët e huaj apo vendor që krijojnë vende të reja të punës.
Gjithashtu, drejtuesit e këtyre dy institucioneve theksuan që një gjë tjetër që hyn në kuadër të përgjegjësive të Ministrisë së Financave që ka një rëndësi tejet të veçantë për prodhuesit është zgjerimi i mëtejmë i listës së produkteve të liruara nga detyrimet doganore.
Në këtë drejtim dhe duke u bazuar në premtimet e dhëna deri tani, kërkohet nga Ministria e Financave që krahas përgjegjësive që i jepen nga Ligji për Mallrat e Liruara nga Detyrimet Doganore, të zgjerojnë këtë listë të produkteve me produkte tjera që përdoren si lëndë e parë në prodhim, në mënyrë që të rritet konkurrueshmëria e prodhuesve vendor.
Në përmbyllje të takimit, drejtuesit e këyre dy institucioneve i ritheksuan bindjet e tyre për nevojën e një pune të përshpejtuar drejt fuqizimit të sektorit privat, si shtylla kryesore e shoqërisë që duhet të bartë barrën e zhvillimit ekonomik dhe krijimit të vendeve të reja të punës.
